យើងតែងតែនិយាយថា “សុខភាពមាត់ធ្មេញ” គឺសំខាន់ តែយើងដឹងថា សំខាន់ដល់កម្រិតណានោះទេ? តើការដែលយើងមានសុខភាពមាត់ធ្មេញមិនល្អ នឹងអាចនាំផលប៉ះពាល់បែប ណាខ្លះ? សុខភាពមាត់ធ្មេញមិនល្អ គឺនឹងនាំផលលំបាកដល់សុខភាពរាងកាយ និងផ្លូវចិត្តផងដែរ។ វាធ្វើឲ្យរាងកាយពិបាក ក្នុងការទទួលយកអាហារគ្រប់គ្រាន់ដែលអាចប៉ះពាល់ដល់ក្រពះ និងជីវជាតិទ្រទ្រង់រាងកាយ។ បញ្ហាក្លិនមាត់អាច ធ្វើឲ្យបាត់ទំនុកចិត្ត ឬ អាចប៉ះពាល់ដល់ការ ប្រាស្រ័យទាក់ទងក្នុងជីវភាពរស់នៅប្រចាំថ្ងៃ។
លើសពីនេះទៀត បាក់តេរីនៅក្នុងមាត់ ដែលអាចបង្ករោគ នៅលើអញ្ចាញ អាចជាប្រភពបង្ក បញ្ហាដល់ សរសៃឈាមបេះដូង ព្រោះវាឆ្លង និងអាចធ្វើដំណើរតាមឈាម។ នៅពេលណាយើង មានបញ្ហាអញ្ចាញ និងនៅពេល ណាយើងដុះធ្មេញទៅមានចេញឈាម បាក់តេរីរបស់មាត់អាច ឆ្លងចូលទៅក្នុងប្រព័ន្ធចរន្តឈាម ហើយអាចទៅសំងំ នៅផ្នែកណាមួយរបស់សរីរាង្គកាយក៏បាន។ មានជាអាទិ៍នៅតាមផ្ទៃនៃសរសៃឈាមក្រហមអាទែរកូរ៉ូនែ ដែលនាំឈាម ទៅបេះដូង។ ហើយគឺពួកបាក់តេរីនេះឯងដែលធ្វើឱ្យស្ទះសរសៃឈាម នាំឱ្យមានបញ្ហាស្លោកបេះដូង។
ការពិត បាក់តេរីនេះមិនមែនជាអ្នកទទួលខុសត្រូវផ្ទាល់ចំពោះការរលាកនោះទេ ការរលាកគឺ កើតឡើងដោយសារ សរសៃឈាមដែលមានបាក់តេរីតោងនោះមានប្រតិកម្មការពារខ្លួនឯងភ្លាម។ ប្រតិកម្មការពារខ្លួន ដែលមានទម្រង់ជា រាលរលាក អាចសម្រួលឱ្យងាយមានកំណកឈាម។ ក្នុងរយៈពេលណាមួយ កំណកនោះនឹងដាច់របើក ពីផ្ទាំង សរសៃឈាម ហូរទៅទើកន្លែងណាមួយ ជាហេតុធ្វើឱ្យសរសៃឈាមស្ទះ។ បើស្ទះនៅត្រង់បេះដូង នោះនឹង ធ្វើឲ្យបេះដូងស្លោក បើហូរទៅស្ទះនៅខួរក្បាល នោះនឹងធ្វើឱ្យដាច់ឬស្ទះសរសៃឈាមក្នុងខួរក្បាល។
ការសិក្សាជាច្រើនទៀត បង្ហាញថា ជំងឺ រលាកអញ្ចាញ ជំងឺរាក់ស៊ីធ្មេញ អាចបណ្តាលឲ្យមានជំងឺរលាកសន្លាក់ ។ បាក់តេរីដែលជាភ្នាក់ងារបង្កជំងឺរាក់ស៊ីធ្មេញ មិនត្រឹមតែជាដើម ហេតុជំរុញឱ្យ មានជំងឺរលាកតាមសន្លាក់ទេ តែថែមទាំងអាចជួយទ្រទ្រង់ការរលាក ដែលមានស្រាប់ឱ្យកាន់តែរ៉ាំរ៉ៃ។ របៀបនៃការឆ្លងគឺដូចគ្នា។ បាក់តេរី បានបណ្តែតតាមឈាមទៅកកនៅម្តុំសរសៃពួរស្មារ។ ការបង្ករោគនៅតំបន់នេះអាចបង្កជាការឈឺចាប់រ៉ាំរ៉ៃ។
ផលប៉ះពាល់ និងជំងឺផ្សេងៗទៀតដោយសារសុខភាពមាត់ធ្មេញមិនល្អ៖
- ទឹកនោមផ្អែម
- សម្រាប់ស្ត្រីអាចបណ្តាលឲ្យក្លាយជាការសម្រាលមុនពេល, ទារកដែលសម្រាលមកមិនគ្រប់គីឡូ និងអាចបណ្តាលឲ្យមានបញ្ហាមាត់ឆែបដល់ទារកផង ដោយសារតែរបបអាហាររបស់ម្តាយមិនត្រឹមត្រូវ
- មហារីក៖ បំពង់ក, អញ្ចាញ, មាត់,...
ការរលាកផ្សេងៗបង្ករដោយបាក់តេរីក្នុងមាត់- បញ្ហាផ្សេងៗកើតឡើងដោយកង្វះអាហារដែលមានសារជាតិចិញ្ចឹមគ្រប់គ្រាន់
វិធីសាស្ត្រក្នុងការថែទាំងសុខភាពមាត់ធ្មេញ៖
- ដុសធ្មេញជាមួយថ្នាំដុសធ្មេញដែលមានសារធាតុ ហ្វ្លអឺរ៉ាយ យ៉ាងហោចណាស់ ២ ដងក្នុង១ថ្ងៃ
- ហ្វ្លស Floss (សម្អាតធ្មេញដោយប្រើសរសៃអំបោះម្យ៉ាង) យ៉ាងហោច ១ ដងក្នុង ១ ថ្ងៃ
- សម្អាតធ្មេញដោយអ្នកជំនាញ រៀងរាល់ ៦ខែម្តង
- ចៀសវាងថ្នាំជក់គ្រប់ប្រភេទ
- ចៀសវាងអាហារ និង ភេសជ្ជៈមានជាតិស្ករច្រើន
- ទទួលទានផ្លែឈើ និងបន្លែឲ្យបានច្រើន
